財政司司長唐英年噚日同一眾高官以及行會成員下晝去晒會展，坐喺第一排，連陳智思、查太都要到，撐煲呔同鬍鬚仔場。梗係啦，咁大件事，團隊成員點可以坐視不理？
到咗晚上，唐唐喺君悅擺咗四十圍酒，請晒啲部長同代表團成員，以盡地主之誼，坐喺主家席嘅重有薄熙來同拉米。當然好多高官都有嚟幫手招呼人客，包括葉澍堃、馬仔、譚榮邦以及蔡瑩璧，D姐俞小姐梗係在場啦。
唐唐請飲紅酒，由法國到澳洲、阿根廷以至智利新舊產地都有得提供，菜式就中西合璧，食點心拼盤，飲白菜膽冬菇湯，甜品就係西式嘅。
有得食，亦有表演睇，聽完葉麗儀唱英文歌，又有中樂表演，而最令代表難忘嘅，可能係變臉呢樣傳統藝術，睇到大家十分入神。
爆料熱線：29290000、27860099
報料傳真：26239278
報料電郵：[email protected]