許志安同韓紅前晚喺新城接受訪問，講起聖誕節，安仔話自己不嬲冇習慣買聖誕禮物，即刻俾在場記者笑佢孤寒，就連韓紅都嘟起個嘴、點頭示意話安仔係一個孤寒嘅人。於是安仔即刻叫佢攞自己部手機出嚟，原來呢部新款嘅諾基亞手機係安仔送畀韓紅嘅，韓紅重好冧咁喺記者面前展示手機裏面佢兩個嘅合照㖭！
西藏求活佛鏈墜
韓紅話佢都送咗條活佛鏈墜畀安仔，原來呢個鏈墜係佢專程去西藏布達拉宮求返嚟，認真誠心。睇嚟安仔同韓紅嘅感情，唔止佢哋所講嘅兄妹關係咁簡單！
唔係馮仁昭自己講㗎，事關佢哋噚日去商台做訪問，齊齊戴黑超，十足情侶裝咁款。記者要求佢哋除低黑超影相，安仔嗱嗱聲除低，同班記者講：「我除啦，佢唔會除㗎喇。」咁細心，難怪有中國雲雀美譽嘅韓紅都心悅誠服、喺安仔面前變身小鳥依人啦！
