年尾將至，又係打工仔最開心嘅時候──如果無俾老細炒兼夾有人工加嘅話！咁過去半年來係咁出新3G機、又喺人哋手上搶咗唔少3G客的數碼通，佢哋嘅員工又點呢？數碼通噚日搞咗個傳媒聖誕聯歡，CEO黎大鈞話，個別表現好嘅同事，都會有人工加兼夾有花紅分，公司亦無裁員或者換血計劃。喺呢個風雨飄搖的日子，都算唔錯啦！相信佢哋班打工仔今年可以過一個HappyNewYear！
講開數記，呢頭出完部2G機，昨日又出部新3G機－－MotorolaE770，今次搵咗兩個性感黑白女模襯番部機，重要係喺一個巨型聖誕禮物盒彈出嚟，夠晒節日氣氛，亦輕易謀殺咗唔少菲林，唔知下個月出東芝嗰部3G時，黎總又會有咩花臣呢？ 李潤芳攝