個市算有韌力，恒指由跌120點變為只跌41點埋單，新世界（017）佔咗18點。短期走勢，仍係擺上擺落。年尾做年結，芬佬要粉飾一下。04年成個12月，恒指升170點。今年，12月初到𠵱家，只係有5點進帳。
建行C輪2107：建行（939）軟軟哋，收2.50元，唔見1格。照道理，建行C輪應該跌啲。有隻9975，冇成交，但買盤掛高24%，照按盤價計升咗24%，收21.9仙。睇行情表，龍虎榜上見唔到，因為冇成交嘅窩輪唔計在內。9975明年12月夠鐘，溢價24.8%，槓桿率11.4倍（有效得4.9倍），引伸波幅33%。咁嘅數據，你買埋我份。咁點解隻輪又可以咁高價掛住？因為零街貨。莊家掛兩邊盤，每邊半球，21.9仙掛入，22.2仙掛出，睇落唔係相差太遠，買落去唔怕蝕章。咪住，咪手痕，除非想做阿茂。
建行值得睇好，揀C輪炒，穩陣揀9983，搏殺則揀2107。
新世界C輪9188：新世界做「披成」，連「披成」價11.50元都守唔住。C輪9188大散47%。隻輪明年2月中夠鐘，溢價2.6%，槓桿率7倍（有效5.6倍），引伸波幅41.6%，數據合理。新世界走勢欠明朗，咪貪隻輪跌得多而上車。
章盛