年尾例牌要大掃除，清理桌面時，執出一大叠已燒錄過的CD-Rom，重用是無可能的了，但丟掉又覺得十分不環保。拿着一張張反晒光的CD-Rom，滿臉惆悵之際，忽發奇想，倒不如利用CD-Rom那反光面做些裝飾，把家居裝飾成PartyFeel，迎接聖誕新年的連場派對！
記者：李淑芬
攝影：周旭文
模特兒：Carrie、Va（Salvador）
閃閃MirrorBall
買個MirrorBall都要三幾百，自己整，買個發泡膠波加免費CDRom，廿零蚊搞掂。CD的底層的反光面，能折射出充滿迷幻感覺的色彩，CDRom有藍碟、綠碟、紅碟咁多種色，而且CD碎片砌成的MirrorBall，反射出來的光比普通玻璃片更豐富。
材料：
CD8張、發泡膠球1個、白膠漿、鐵線、熱溶膠
做法：
提提你！
–CDRom硬度隻隻唔同，部份碟剪落去會「崩邊」，若出現此情形就要搵個另一隻，否則貼出來會相當醜樣，嘥氣！
–用於發泡膠上的膠漿，最好選用白膠漿；若用上其他含化學溶劑的膠水，會溶掉發泡膠球。
CD碎片四射剪時要戴眼鏡！
唔只去迪士尼要做足準備，剪CD都要。由於CD膠質頗韌，剪時碎片隨時四射，安全計都係戴番個眼鏡穩陣啲。另外經驗話我知，普通文具鉸剪唔多夠力，剪一張CD後手指已經攰到死，包你未剪夠碎片已經想放棄，預備定一把重型鉸剪，剪來亦爽手得多！
用剪刀剪碎CD時，先預備放一紙盒墊着，CD碎片便可盛載起來。
馬賽克蠟燭杯
聖誕節樣樣都要Warm，蠟燭杯紅紅綠綠，Fit晒啦。普通透明蠟燭杯太單調，想有獨特風格，可以黏上不同形狀的馬賽克圖形，點亮後，份外加添了歐陸感覺。準備定平安夜用，都幾感動㗎，準備定，求婚都掂呀！
材料：
CD2隻、蠟燭杯2個、萬能膠、修補用白英泥1支
做法：
提提你！
–黐發泡膠就用白膠漿，黐玻璃就要用萬能膠先黐得實淨。
–黐磚仔要見好就收。玻璃杯本身透明，咪見到唔使錢就搏命黐，最終變成個唔曉發光嘅蠟燭杯！
改裝相架夠Raw！
十蚊一個的木製相架，平平無奇，鍾意就話佢素淨，但睇得多實在有啲悶，見佢擺咗幾年有少少污糟發黃，不如又將佢裝飾成馬賽克特架啦！製法簡單，效果亦相當唔錯。
材料：
相架1個、CD2隻、萬能膠、修補用白英泥1支
做法：
提提你！
–在選擇CD時，適宜揀選起碼兩種有顏色面層的CDRom，撞吓色，砌出來的圖案便會有多點色彩。