呢個聖誕，班高官同議員真係要多謝煲呔同肥龍，搞到佢哋人人都唔敢放假，事關政改兩個決議案下周三如上會，大家都估，就算其他兩項辯論閃開，都要搞足三日，最快二十三號黃昏先收得工。唉，如果立法會唔係遷就煲呔讀施政報告押後咗一個星期（即係十月十二日）先開鑼，今個禮拜都收晒爐啦，使乜咁慘情？
買定機票等放假
八方同啲富貴黨中人傾過，雖然大部份都話二十一至二十三號誓死留港支持政府方案，但聽聞有啲人就踩少少鋼線，買咗二十三號晚嘅機票，諗住一開完會就即刻走人，既向煲呔示好，又可以充份利用時間，真係一舉兩得。
佢哋真係計算準確，放假放得安樂，難為政府官員提心吊膽，雖然預咗方案俾人否決扑低，都唔可以冇晒啲中堅分子捧場嘛。
有「自八公」之稱嘅林健鋒承認，聽聞有人二十三號會飛走，但唔肯透露邊啲人咁斗膽。至於佢自己呢？都算為政改犧牲，事關原來二十一號開會日，係佢姐夫六十歲大壽，佢已經同屋企人講明，話可能食食吓飯又要走開去投票，總之就跑嚟跑去冇得停。
二十二號碰啱係冬至，林生都應該冇機會同屋企人食晚飯喇，正所謂冬大過年，都咪話唔可憐。但佢不忘向記者送高帽，話同記者一齊食飯幾好㗎喎。
查實𠵱家最關鍵嘅，睇怕都係泛民嗰邊。白鴿黨頭頭達仔話，好多自由黨同民建聯中人甚至高官，猛問佢哋二十三號係咪可以完會，睇怕都係想速速散會放假去也。但係一個咁重要嘅議題，政府底牌未揭，泛民又點敢行開半步？買定機票實在太大風險。
對於個方案，達仔只以一句「處之泰然」作回應，實行等住否決；前主席馬丁就話政府唔好再搞咁多嘢，反正立法會唔夠位坐，原地踏步好過。馬丁當然唔會喺呢啲關鍵時刻鬆人，加上佢下個月四號有官司要打，睇怕佢呢個聖誕假都唔會得閒得去邊。
泛民防深海活動
進入政改最後衝刺階段，肥龍反而唔見咗人，有人話肥龍放軟晒手腳，留番畀煲呔盡最後綿力。不過，張文光就警覺性甚高，佢話表面平靜唔等於冇人喺深海活動，一定要提防「鮑磊事件」重演，記得當年肥彭搵到祖家出手向太古施壓，最後拉回鮑磊一票，反敗為勝。而B方案遲遲未出，更係形迹可疑，唔知煲呔係咪想拖到加時，等泛民冇得追？
爆料熱線：29290000、27860099
報料傳真：26239278
報料電郵：[email protected]