前年5月先至喺香港開辦事處嘅凱萬資產，下個月中就會搬到中環中匯大廈，面積有成４千幾呎，唔單止地方比𠵱家大三四倍，重唔使再寄人籬下（之前同美國萬通共用辦公室），班員工就梗係開心啦！凱萬常務董事莫健歡同華華講，佢哋揀辦公室都揀咗好耐，連總公司都有派人嚟幫吓眼，最終先揀到中匯。
佢又話，雖則要下個月先知有冇花紅分同人工加，但之前環境冇咁好，都未試過冇雙糧，今年又一早做夠數，所以都應該幾樂觀！
為咗避開WTO，佢哋噚日都有停工，之後就要睇吓事態發展如何，先決定幾時開番工！唔好以為唔開工就有假放，莫健歡同班同事就趁停工呢日約傳媒食飯，聯繫吓感情兼預祝聖誕，飯敍前重特登抽空去行家具店，為新辦公室揀桌椅用品，果然係識得善用時間。