我阿利住新界，退休後甚少出城。嗰日揸車出中環HKClub同啲老友食飯，駛過灣仔，感覺好似水靜鵝飛，有啲大戰如箭在弦嘅氣氛。又話搞世貿可以為香港賺幾多幾多，但睇個款，似做少好多生意，貼錢畀世貿居多。
講開世貿，陀地公會星期五開AGM，唔知係咪驚中環金鐘有人暴動，搞到要響銅鑼灣開，銅鑼灣嘅邊處？之唔係響世貿中心囉，幾應景。
逢親開AGM，梗係要換過啲理事。年年都係「四大」支持嗰啲候選人跑出，今年都應該唔例外。其實每年得嗰幾千人投票，手揸其中一半以上票源的四大可謂控制大局。呢班鳥籠選舉，冇權冇勢咪使旨意贏到。
不過今年AGM，斷估戲肉唔係阿乜水乜水做咗理事，而係揭曉政改問卷結果。早輪報紙話陀地公會受政府唆擺，搞問卷調查會員對政改嘅態度。卒之響上星期，公會send咗個電郵畀會員。
吼正AGM發布結果
我阿利做咗咁耐會員，望望份電郵問卷，都有啲莫名其妙。第一，淨係send電郵，嗰啲無畀電郵地址嘅會員咪問唔到？第二，截止日期係今日，擺明要嗱嗱臨，趁AGM多記者時發布，用意就唔單止係搜集意見啦。
重有，問題只係簡單兩條。一，政府方案可以定唔可以接受。本來咁就好容易，非黑即白。不過，公會重加多條尾，叫「雖不滿但尚可接受」。有呢個答案，白癡都知會員點填。
第二條問題，問會員想會計議員投贊成定反對票。有咗第一條答案，第二條呼之欲出。換言之，呢份問卷唔似真心想問意見，擺明夾阿議員。
不過，阿議員黐咗大狀黨，下年怕且都諗住直選，睬你班會計佬都儍，𠵱家最緊要跟住班大狀衫尾，令佢哋Happy。
會計佬點算？咪當自己被人搵咗笨四年囉。