新世界發展（017）配股後，證券行紛紛調低新世界投資評級兼唱淡，為新世界近期的炒風降溫，結果新世界股價大跌12.4%至11.30元，跌破埋配股價11.50元。
唔少證券商都話新世界淨負債比率只得23%，邊使配股集資，有意無意暗示周大福配股畀友好，以鞏固在新世界控制權。新世界噚日大跌之際，錄得14.2億元大成交，唔知係咪反映TCI已知難而退，開始減持呢？
TCI未必知難而退
黑客話，咁樣唔似係TCI嘅作風，新世界累積升幅不小，現時有不明朗因素，當然會有其他投資者先行出貨獲利，反為TCI提供低價收集的機會，新世界係咪已經炒完，實在言之尚早。
i師傅則話，如果周大福今次真係配股畀自已友，換言之周大福與可能同一陣線者在新世界的控制權將由35.52%升至40.45%，距離50%只差9.55%。假如真係打起收購戰，彤叔一方贏面相當高，而TCI則要搞清楚究竟公眾股東中，是否已有9.55%股權由彤叔友好及忠實支持者控制。
百仕達（1168）急升過後回軟，噚日挫11.11%，收報2.40元，但仍較配股價1.95元高23%。原來TCI認購百仕達8000萬股前已持百仕達7938.4萬股，認購後持股量升至6.05%。呢個消息隨時會支持百仕達來一個蜈蚣彈。
偉易達跌至一波目標
偉易達（303）遭拋售，勁挫7.4%至23.75元，成交達7345萬元，已到咗偉易達大淡友一波嘅目標價24元。黑客話，若見成交縮減，可能係趁低吸納的良機。偉易達所生產嘅兒童教育玩具好好賣，反映好識得搵家長錢，家長們或者可以諗諗買偉易達股份，來幫補日後子女教育玩具的開支。
阿虎