陳文媛（BoBo）的芝娃娃Vanilla雖然狗仔細細，但非常有人性，無論家中水喉未閂，抑或大門未關，牠都懂得吠主人提水，晚上更會等齊人回家才開飯，難怪小狗在陳家地位崇高，更深得BoBo嫲嫲愛錫。
陳文媛的短毛芝娃娃狗女Vanilla芳齡兩歲多，日前她抱愛犬到杏花村耍樂，特別為牠穿上大紅毛衣和紅冷帽禦寒，一人一狗玩掟波時，沒想到Vanilla狗仔細細但彈跳力驚人，一躍已到BoBo大腿位置。
等齊人食飯
原來當初BoBo買Vanilla時，牠只是條頂包狗，BoBo解釋：「其實我係想買一隻黑色芝娃娃，但店員話暫時未有，夜啲會有新狗送過嚟，叫我再嚟睇過，後尾再睇就見到Vanilla，當時佢得手板咁細，見佢都幾得意，隔咗一晚就買佢返嚟，佢都算合作，幾乖，我同嫲嫲一齊住，佢不嬲都唔鍾意狗，但都竟然鍾意佢喎。」
BoBo嫲嫲喜歡Vanilla，原來是因為牠醒目又有人性，BoBo說：「之前嫲嫲喺屋企唔記得閂水喉，佢會吠，引人注意，佢知要閂水喉㗎。
BoBo續說：「有次屋企閂鐵閘冇閂大門，佢又係咁叫，識得保護屋企，同埋佢好鍾意等人返屋企，每晚都要等齊所有人返嚟至食嘢嘅。」
進佔主人房
Vanilla冧人有一手，難怪可以進佔BoBo雙親主人房，BoBo笑說：「佢喺屋企有張床仔，瞓晏覺就瞓自己張床，夜晚就跟我爹哋媽咪瞓，佢會瞓喺爹哋媽咪中間，做電燈膽黐實人。佢似人多過似寵物，好識睇人眉頭眼額，見你同佢玩就好活潑，知你唔耐煩，就會行開，唔會搞住晒。」
採訪：朱倬誼 攝影：陳慧安
