碰到一位風險管理顧問，專負責核查公司嘅風險管理系統，公司管治，compliance等，佢話呢行叫做riskaudit（風險核數）。
愈來愈多新名詞，都唔知點繙譯，大學繙譯系嘅教授多數教文學，唔識財經，啲繙譯系學生唔知點樣學財經繙譯呢？譬如：compliance嘅中文係乜？上述顧問唔好意思咁同左丁山講：「我嘅中文唔係幾好。」佢位助手立即提水，話叫做「合規」，左丁山諗一諗，「合規」對compliance，都可以，但如果唔知頭尾，將銀行內嘅complianceofficer譯做「合規主任」，普通人好容易睇到一頭霧水，合乎規矩呀？合乎規格呀？合乎規律呀？最收尾先至會諗到係：「合乎政府監管當局針對某行業所頒布嘅一切法規」，律師、銀行、保險業、經紀所要做嘅compliance不盡相同，合規呢個「規」字都有好多唔同解釋。
又如leadmanager，香港譯做「牽頭經辦人」，冇話唔啱，但讀出嚟，冇晒leadmanager嘅威風、尊嚴，總之唔夾。
譯名原來可以引起外交風波。亞洲華爾街日報（十二月七日）講到美國副特別談判貿易代表RobertZoellick九月尾喺紐約演講，講咗一句：「要推動中國成為一個負責任嘅stakeholder」，美國國務院將stakeholder譯為「利益相關的參與者，中文繙譯上網之後，中國當局、中國學者紛紛要求解釋何謂利益相關的參與者，中國派人到布魯金斯研究所（BrookingsInstitution），問過究竟，研究一番後，中國學者用咗幾個譯名：（a）利害攸關的參與者，（b）共同經營者，（c）參股人，（d）合夥人，莫衷一是。
如果中國學者肯嚟吓香港，見吓我哋羅范椒芬女士，就唔使橫越太平洋嚟研究stakeholder嘅中文譯名，羅太講教育，經常唸唸有辭講「持分者」，教育界嘅「持份者」包括政府、學校、教師、家師、學生。香港將stakeholder譯做「持分者」，唔知北京啱唔啱聽呢？