世貿會議正式開幕，場內文鬥，場外文武鬥兼備，好在暫時重未有大件事發生。至於股市，噚日中段失驚無神插咗落去，恒指最多曾跌120點，午市定番住，收14942，跌41點。
新世界發展（017）有被狙擊危險，老人家出招，希望可鞏固城池，但基金不滿，大舉拋售，新世界大沽盤不斷，收11.30元，跌1.60元，成交大增，相信老人家嘅「友好」在低位亦買咗唔少貨。
大市雖跌，長實（001）同新地（016）就逆流而上，長實最靚，收80.35元，升0.40元，和黃（013）則仍然好弱勢，最低72.25元，收72.55元，仍跌0.55元。不過，滙控（005）、長實同和黃嘅C輪，有轉勢之兆，特別係長和輪，強勢更為明顯，長實同和黃乃近期大藍籌中嘅弱勢股，若然轉勢，大市可能到底。
股價折讓24%
石化股私有化進程已行咗一半，已成功及進行中的公司有北京燕化、吉林化工（368）同鎮海煉化（1128），私有化作價比每股資產淨值都有一個可觀溢價。中石化（386）餘下要進行私有化的公司係上海石化（338）、儀征化纖（1033）同中石化冠德（934）。冠德已講過，上石化股價已高過資產值，儀征股價則重有好大折讓，現價買儀征，博私有化，好大機會賺50%以上；至於時間，唔會太長，明年中之前就可見功。
3隻石化股私有化作價都高過NAV好多，燕化有溢價62%、吉化有105%，而鎮化更有144%。儀征截至今年6月底止嘅NAV係2.09港元，儀征噚日收1.58元，折讓24%。有理由相信儀征私有價比NAV高，即使只係高20%，都去到2.50元，1.60元水平買儀征，好大機會賺56%。如果溢價再高啲，利潤自然更大。
公司若要私有化，業績自然唔係最重要嘅考慮因素，吉化係明顯例子，吉化由7月中升到10月底就成事，儀征由10月底起步，相信過咗農曆新年就會有佳音。家吓1.60元有阻力，升破後可追入，第一站係2元。
郭兆誠