「小朋友」威力繼續震撼股市，新世界發展（017）批完新股昨日復牌，股價即跌12.4％，金魚缸內大家即時估緊係唔係「小朋友」出貨。
至於「小朋友」日前入股嘅百仕達（1168），前日炒高後，噚日即跌11.11％，收2.40元，當大家以為百仕達已經炒完，聯交所資料又披露，原來「小朋友」除咗在配股中買入3％外，本身一早已經有貨，現時加埋成6％咁多，真係峯迴路轉。
至於「小朋友」近期買入嘅新股領匯（823），噚日升4.3％，收14.55元，再創新高。呢陣「小朋友」旋風，認真唔可以睇小。
另外，已經炒咗一輪嘅百威國際（718），噚日成交突然急增，兼且出現大手成交上板，股價勁升9.52％，收0.207元。經紀陳話，據講係有新人落場參與，所以場面先至咁熱鬧。
百威早排話有意洽購大陸從事化工產品的公司，似乎有轉型之意，既然有藉口有水源，要進一步炒高實在唔出奇。
慕容小初