楊思琦飼養了一家八哥犬，兩年前狗媽八妹有喜，便是由思琦捱通宵親自接生，並把誕下的四胞胎取名嘻嘻、哈哈、吱吱和喳喳。日前思琦帶哈仔和嘻女外遊，熱情爆燈的哈仔甚受小朋友歡迎，相反嘻女就一味靠黐嗲主人。
楊思琦飼養了七頭八哥犬，早年先買了狗爸懵懵豬，再買狗媽八妹配成一對。兩年多前，八妹誕下五胞胎，可惜頭一胎的小狗不幸死去，餘下四頭小八哥，依次取名嘻嘻、哈哈、吱吱和喳喳，及後思琦又養了一頭雄性八哥，取名八八BB，一家七口的八哥團聲勢的確浩大。
最叻𠱁小朋友
日前思琦拖哈仔和嘻女到九龍塘玩耍，哈仔在公園又跑又跳，熱情又主動，把正在玩耍的小朋友逗得笑逐顏開，相反嘻女就一味嗲主人。
思琦表示年前八妹臨盆，由她負責接生，至今印象難忘，她說：「我親自接生㗎，睇住啲狗仔出世，之前我帶八妹睇醫生，醫生叫我做好準備，話隻狗好快生啦，點知等咗三日兩夜，等到頸都長埋至生，佢生啲狗仔又唔係咚咚聲咁生晒，隔三、四個鐘至生一個，嗰日由凌晨兩點幾搞到第二日，我重幫啲狗仔剪臍帶。我見狗媽咪猛舔啲狗仔，連啲污糟嘢都食埋落肚，當幫佢哋沖涼，我見到狗BB出世好感動呀，同埋覺得狗嘅母愛都一樣好偉大。」
思琦除為愛犬接生外，更是八哥家族的御用修甲師，她笑說：「屋企咁多隻狗都係我幫佢哋剪指甲嘅，一次過剪晒都係十分鐘，我唔敢叫工人剪，因為試過剪到流血。」
搖頭擺尾迎接
思琦又謂回家時見到七頭愛犬衝前擺尾迎接，都會份外高興，她說：「其實七隻狗都好錫我，佢哋好乖、好熱情，有佢哋氣氛會好熱鬧，我最近重喺屋企天台搭咗間大狗屋，因為啲狗仔有時會爭寵打交，有大啲地方玩會好啲。」
採訪：朱倬誼
攝影：仇志德
