近日有報道指衞蘭同英皇嘅關智斌（Kenny）撻着，話佢哋喺幾個月前交換電話號碼後，就不斷煲電話粥傳情，重講到衞蘭好㗳Kenny糖。
從沒約會
噚日馮仁昭同衞蘭所屬嘅AMusic傾開呢件事，唱片公司方面話緋聞係無中生有，令藝人唔開心兼影響歌手同公司之間嘅感情之餘，呢種搞緋聞嘅宣傳手法，亦等同摧毀樂壇。
AMusic負責人王凱文噚日話衞蘭最初都冇理緋聞，出親嚟都只係嘻嘻哈哈回應就算，但一次係咁、兩次又係咁，日前新城新人巡禮上又俾人攞嚟做話題，搞到衞蘭好唔開心，因為衞蘭從來冇畀電話號碼對方，但唔知點解Kenny竟然有佢電話，重打過幾次畀佢，不過次次衞蘭都做緊嘢，絕對冇同佢煲粥。
王凱文又話衞蘭只係喺公眾場合見過Kenny，冇同佢去過街，衞蘭當Kenny係朋友，點知𠵱家搞成咁，實在有俾人利用嘅感覺。
王凱文強調今次係對事唔對人，唱片業已經好難做，大家應該腳踏實地做好音樂搞好個市，唔應該有人自製花邊新聞，否則到頭來大家都冇得益，咁搞法樂壇重邊有接班人呀？
