日股大升，港股睇住日股高開，早段升過169點。埋單有回吐，升得73點。重磅3寶滙控（005）、中移動（941）與和黃（013）總共拉高恒指43點。估計個市反覆向好，有平嘢，要買貨，等收聖誕禮物。
滙控C輪4841：滙控今年會否有「聖誕鐘炒滙豐」呢支歌仔唱，當然兩個禮拜後至知，但以滙控落後、低PE嘅條件，炒高三幾蚊嘅機會好大。04年聖誕過後，滙控造133.50元，𠵱家只係124.70元，低咗8.80元，睇嚟水位好足。
滙控昨升0.60元，C輪4841理論升幅4.2仙，昨升4仙，收56仙，啱數。
隻輪明年3月尾到期，溢價0.6%，槓桿率22.3倍（有效15.4倍），引伸波幅12.7%。數據好靚，靚在溢價低。有啲推銷員話炒輪唔使睇溢價，咪信。睇吓隻國壽C輪3487，上個禮拜五負溢價，昨日正股（2628）微升1格，隻輪一升絕塵，升22%。
滙控C輪4907：4907昨日理論升幅3.3仙，但升得1.5仙，抵買。隻輪明年4月初夠鐘，輪價34.5仙，溢價1.4%，槓桿率36.1倍（有效20.2倍），引伸波幅11.1%。溢價雖然比唔上4841，但爆炸力則贏咗。
章盛