某啲經紀向散戶硬銷炒金。金管局似乎向銀行硬銷「綜合利率」（CompositeRate），俗稱C，以代替優惠利率（PrimeRate，俗稱P）作為按揭貸款嘅基準。目前銀行借錢畀客仔買樓，利率以P減二，P減二點二五計算，銀行究竟賺到幾多息差，只有銀行自己知，間間銀行都唔同，因彼此成本有異也。渣打嘅P係七點七五，P減二點二五就係五點五厘，滙豐嘅P係七點五，P減二點二五係五點二五厘，係唔係渣打賺多啲呢，未必，因為滙豐嘅儲蓄存款多，資本成本會平一啲。
好嘞，金管局根據銀行提供嘅資料，用唔知乜嘢方程式，用乜嘢加權（Weighting）計算一個C出嚟，今年九月底嘅C就係二點三三厘，並建議銀行按揭貸款，不如用「C加」代替「P減」喎，銀行睬你都儍，如果A銀行採用此方法，十年按揭貸款收C加三，等於六厘，咁咪畀競爭者（其他銀行）知道晒自己嘅資金成本？如果成本上升，要將C調升嘅話，分分鐘俾人質疑。金管局到時如果表示「關注」，問A銀行：「人哋嘅C唔升，點解貴銀行嘅C上升呀，有冇出現問題呀？」A銀行就自招麻煩，有排解畫。
P高於C，係普通常識，按揭高幾多，食水多深，係銀行商業秘密，講出嚟，就冇晒靈活性。銀行界十分團結，在銀行公會達成共識，一於繼續用P，一來係保護利潤，二來係保持靈活性，唔想用電腦計C嚟代替人腦決定P。金管局以中央銀行自居，但在決定利率方面，係冇牙老虎，一來係聯繫滙率關係，二來係港英政府迫銀行界取消利率協議之後，每間銀行都有權決定自己嘅優惠利率。
今年九月底嘅C（據金管局計算）係二點三三厘，一啲教授話銀行食水深，乃不懂實務之言。自由市場中邊個會認為微軟借錢會貴過街頭阿伯㗎？銀行借錢畀大戶，息差係二十、三十點子，如果唔向陳大文收番P減二點二五，銀行分行點樣可以應付貴租？