玩車花錢花精神，最近小記無意中發現有一個得意網站，可以玩虛擬Tune車，唔使花錢就可以天馬行空，確係幾得意，於是特地介紹畀鍾意發夢嘅車友！
記者、攝影：戴維浩
抵玩指數：＊＊＊ 發夢指數：＊＊＊
網址：http://config.sportcompactcarweb.com/
揀心水車
首先當然揀番部心水車，車款唔多，不過就有熱門街飛，例如「露筍」8代、350Z、RSX、重有最新響美國上市嘅CIVICSi。如果本身擁有以上嘅車款，攞去改之前就可以順便當呢次係預習，睇吓改咗之後靚唔靚。
換軨
跟手就可以揀胎軨，牌子有7隻，有東洋產品亦有美國貨，二十幾三十款揀。揀完款記得揀埋輪圈大細，18吋—20吋任君選擇。
懸掛
嚟到Tune避震機呢一環，可以將行程隨意縮短或者加長，留意畫面喇，自己架車真係會low低㗎！不過就無剛柔度調校，同只有1種牌子出品嘅避震機，有少少失望囉！
換胎
順手揀埋輪胎，只有兩個牌子，好快手就搞掂喇！接續可以Tune埋個碟煞碟同隻鮑魚仔，咦！點解無brembo揀呢？
自己噴色
乜嘢都Tune好就可以玩吓色水喇！要出「色」到唔夠膽揸出街都得，因為色調自由發揮，原理同喺Photoshop入面校RGB差唔多。
欣賞自己作品
完成作品之後可以檢視一下，唔滿意可以重複之前做過嘅任何一個步驟，就算𠵱家後悔，換埋架車都得，而原本Tune車嘅零件設定就保留不變，真係相當方便。美中不足的是，如果呢個網站可以做到連偈同Body-Kit都可以TailorMade嘅話就無懈可擊喇！