睇嚟對沖基金TCI與新世界發展（017）愈玩愈大，TCI最初增持新世界至7.45%，市場對佢狙擊新世界一事都係估估吓，點知新世界噚日突然停牌，市傳配股畀大股東周大福，亦有傳聞話配股畀7個本地友好機構投資者，但無論配股畀邊個都好，明眼人都睇得出周大福欲鞏固本身在新世界的持股量，意味周大福亦怕咗TCI再有後着，所以要先下手為強。
同系的新世界中國（917）股價下挫5.84%至3.625元，可能係市場覺得新世界復牌後股價會下跌，從而拖累新中，預先沽定貨。黑客話，估計TCI唔會咁易就放棄，即係話呢單嘢有排玩，而新世界亦可能有排炒。不過，佢哋頂晒龍都係玩到新世界清盤拆骨，即係話資產淨值應是今次炒作的上限。摩根大通早前估計，新世界每股資產淨值為19.40元。
百仕達（1168）配售2.8億股，每股1.95元，其中8000萬獲TCI認購，相當於入股百仕達3%左右。百仕達噚日復牌一度勁升逾40%，唔通市場又炒狙擊兼拆骨？
Cookie話，呢次TCI應該是善意入股，而非為狙擊而入股，所以大家毋須太敏感。對沖基金入股一間公司，不一定要狙擊及將公司資產拆骨出售，只要管理層能搞好公司，為股東創造財富，讓股東獲得理想回報，佢哋就會滿意，唔會亂咁搞事，拆骨行動通常只針對管理不善，以致股價遠低於其實際價值的公司。
近期股價表現有啲起色嘅彩星（635），被核數師指存在會計失當行為，股價應聲大挫9.8%至1.01元。由於今次事件涉及企業管治問題，相信芬佬有排都唔敢沾手此股。
國壽升近阻力
中國人壽（2628）近期頻見外資大手增持，走勢強勁。i師傅話聽到有此股都有對沖基金收集，不過股價逐步逼近6.50元高位，如果此關升不破及掉頭回落，將形成雙頂走勢，後市利淡。但對沖基金增持消息若屬實，則不難上破阻力位。
阿虎