世貿會議今日開幕，各單位嚴陣以待，華華昨日去恒生銀行中環總行食蛇宴，發現佢哋喺地下嘅保安明顯加強，電梯旁重設咗個小型站崗，查詢每名訪客應誰邀請及前往的樓層，不過整個流程都很快速，無乜唔方便。無他嘅，小心駛得萬年船，若果世貿會議最後反高潮，一切示威遊行和平進行，咁咪皆大歡喜。
華華同恒生私人銀行及信託服務主管朱婉儀傾開偈，佢話為咗平衡保安及貴客感受的考慮，喺行方實施特殊保安期間，若有私人銀行客戶需要造訪該行，佢哋會考慮在大堂等候客戶，此舉可避免客戶被查問時的不便。梗係，私人銀行大客噃，係要貼身服務。
講開又講埋，新一年度嘅「恒生銀行海外留學獎學金」計劃已接受申請，有意升讀英美著名大學嘅學生不妨諗諗。呢個計劃喺96年成立，到今年已有29個學生獲頒獎學金。每個獎學金金額最多75萬港元，慳慳地夠讀完幾年大學。副董事長兼行政總裁柯清輝話，培育香港優秀年輕人才，係恒生對建立香港美好未來嘅重要投資之一。的確係噃，因為獎金得主讀完書後，條件之一係必須返香港工作最少3年。