恒基千色百貨，愈開愈多，遲啲會開市區最大百貨店，地點選大角嘴港灣豪庭廣場。
新店逾七萬呎，佔成個商場一半，肯定係最大租戶，下季開業。聽講，恒基喺港灣豪庭廣場𠵱家經營緊超級特賣倉，但分散唔同角落，今次集中一齊，變身為千色百貨，聲勢大啲。
恒基共有六間千色百貨，喺荃灣城市中心二期商場，係第一間又係面積最大，足足有十三萬呎，第二大喺將軍澳新都城中心商場，八萬五呎。港灣豪庭廣場百貨店開幕後，會成為第三大。至於市區暫時只得尖沙嘴美麗華商場有百貨店，規模最細，得兩萬五千呎。
千色百貨咁多店舖，全部都開喺恒基商場，計埋出年嗰間，總面積有四十五萬五千呎，係咪「肥水不流別人田」呢？
電郵地址：[email protected]