世貿會議開幕前夕，港股平安無事，恒指一度上升169點，收14984，升73點，成交唔多，只得168億元，市場觀望氣氛都幾濃厚。
上月底提過嘅資本策略（497），噚日高收1.29元，升4仙，成交僅190萬股，貨源大部份落在基金同實力揸家手中，呢一隻係冷門高資產股，每股資產淨值估約2.40元，現價折讓逾46%。
資策引人入勝嘅，係主事人鍾楚義同大孖沙及機構投資者好傾得埋，最近先同雷曼兄弟基金合作買入一幢大廈，基金正四圍覓食，資策被「挾中」機會頗大。
華彩控股（8161）噚日成交775萬股，比前兩日大增，收2.675元，升5仙，此股近期由低位回升，在2.60至2.70元整固多日，噚日高收，若升破20日線（2.70元），可以追進，以量度升幅計，上升目標指向3.20元。
市場有消息，話華彩1個月內會在全國各省推出即開型彩票遊戲基諾（Keno）終端機，達400至600台，計劃到明年底會增加到1萬台，而07及08年會額外再推出2萬及3萬台終端機。華彩現時已成為基金股，大行看好，目標價4.20元。
由彩票股轉到賭股，且一樣係基金揸重而睇得好好嘅新濠國際（200），近日由8.50元升上9.90元後出現調整，噚日收9.25元，跌0.15元，走勢形成旗形，成交大幅縮減，調整快將完成，若升破9.50元而成交配合，升浪再起，初步上升目標係11元。
在同業中佔優勢
新濠旗下嘅摩卡角子娛樂場已開到第5家，全澳門現時有2800部角子機，新濠有800部，市場佔有率28.5%，但由於每部機的收益比平均數高出頗多，以營業額計的佔有率高達40%，新濠計劃每年開設3至4家新店，每店約有150部角子機。
新濠與澳博關係密切，又與澳洲最大賭場營運商（PBL）合作，在氹仔發展澳門皇冠賭場及酒店項目，在同業中佔有優勢，大行看好其前景，推薦買入，目標價13元。
郭兆誠