蒙嘉慧前晚和曹永廉在灣仔為電視劇《樓住有情人》拍攝一場咀戲，因為遷就角度關係，所以兩人共咀了四次，曹永廉大讚對方很好咀，不過他笑指已事先向女友姜依蘭備案，幸得女友體諒，更籲他放心去咀。
蒙嘉慧前晚和曹永廉在灣仔拍攝電視劇《樓住有情人》，當晚拍攝的戲份是講述曹永廉激怒蒙嘉慧，用甜言蜜語𠱁回對方之際，突然向她索吻。
蒙嘉慧和曹永廉當晚先拍攝了鬧交戲，而咀戲則留到最後，兩人都為該場咀戲，預先食香口膠及糖作口腔清潔，曹永廉更找來男工作人員試位，最後蒙嘉慧和曹永廉因要就機位拍攝角度，共咀了四次。事後，曹永廉更十分抵死地笑指蒙嘉慧的咀好甜，好好咀。
感覺亂龍
蒙嘉慧笑指今次與曹永廉拍接吻戲，感覺有點兒亂龍，她笑說：「因為之前同對方拍《法證先鋒》，佢做我下屬，而今次就要拍kiss戲，所以感覺有啲亂龍，不過佢都好好，預先有做準備。」但她稱拍咀戲會遇上一定程度的尷尬，蒙嘉慧說：「同對手熟定唔熟，都會尷尬，熟就會尷尬啲，唔熟都會，但就會認真啲，試過喺內地拍劇第一日開工就同陸毅咀，重要激吻連場，不過因為係代表香港演員，唔衰得，所以即刻要做得好放。」問到那次是否最激的接吻戲，蒙嘉慧說：「唔係，最激係我同方中信喺兩個鐘頭之內，喺雨中不停咁咀。」
事先備案
而曹永廉拍完該場接吻戲後大讚蒙嘉慧很好咀，他笑言已向女友姜依蘭事先備案，他說：「我同佢講同蒙嘉慧拍咀戲，佢叫我繼續錫，因為佢要打牌。」不過其女朋友都明白他做此行的苦處，所以不會為此打破醋埕。
採訪：駱華齡
攝影：藍文浩
