嶺南大學噚日舉行第三十五屆畢業禮，首次邀請到特首曾蔭權為榮譽博士「扑頭」，不過唔知係咪早前俾人話佢唔帶安全帶激親，煲呔上車離開時扁晒嘴。
講番個畢業禮，今次獲榮譽博士嘅包括廖創興董事總經理廖烈武、羅文錦律師樓高級合夥人羅德丞、田家炳基金會創辦人田家炳、聯合國貿易與發展會議秘書長素帕猜，以及諾貝爾經濟學獎得主、現時任教於哥倫比亞大學嘅斯蒂格利茲教授。因為素帕猜曾經做過世貿總幹事一職，嶺大公關重驚有人會嚟示威，特別劃咗示威區，點知最後冇人嚟，唔知佢哋係咪嫌屯門太遠呢？
咪睇羅德丞愈嚟愈瘦，查實佢都唔知幾健康，食得瞓得兼玩得。佢有個老友就同八方講，話早前同埋羅德丞以及幾個好友，去咗中環一家頂級酒店食飯敍舊，估唔到羅德丞好擦得，一個人食咗成十二隻生蠔，睇到成枱人眼擎擎，果然真係「蠔」傑，因為其他人只係食到六隻左右。
羅德丞係香港政壇曾經紅極一時，當時重以為佢機會做首任特首，唔怪得噚日孫公同李少光都專程去屯門賀呢位老朋友。
爆料熱線：29290000、27860099
報料傳真：26239278
報料電郵：[email protected]
