每有新主機，玩家都先會留意有冇啱玩大作，然後再考慮買唔買機，XBOX360頭炮巨作《DEADORALIVE4》原本會喺主機見街當日（12月10日）同時推出，不過喺幾日前又宣布要延至12月29號，雖然日期一改再改，但相信只會令玩家更加充滿期待咁等隻Game面世！
記者、攝影：梁瑋瑜
場景立體多變
《DOA4》一直都好神秘，無論喺今年TGS定係喺日本舉行嘅XBOX360LaunchParty，都唔見此Game有得公開試玩；不過小記就有幸喺日本同香港嘅記者會試玩過。今次《DOA4》令人印象最深刻嘅，首數係佢個16:9加高清輸出畫面，絕對前無古人；為咗配合咁高強嘅畫質，遊戲畫面都要作出了適度安排，首先是戰場背景，真係一樹一草一木無時無刻都在變動，再加複雜多變的光源效果，打機畫面靚似CG動畫，試玩時有一刻抽離問吓自己，我係咪真係打緊機；現場最多人玩都係一個以櫻花樹作背景嘅場景，畫面勁立體，背景玩淺景深，不過模模糊糊中場景仍表現出XBOX360高機能的細緻，不過更令人目瞪口呆者，就是片片的櫻花有如隨着角色動作而起舞，立體感盡表現！
人物動作表現有力
至於人物角色方面，MotionCapture嘅戰鬥技，點睇都係走唔甩！不過更惹現場人士驚歎者，是每個動作所表現出的一種力度；由於人物設計真、戰鬥動作細緻，感覺有如睇「李小龍」電影一樣，拳拳到肉；相對以往的舊式格鬥Game，感覺有如睇翻炒的粵語長片玩「偷位打」一樣！另外，衣服的設計亦值得一讚，唔好會錯意以為筆者喜歡佢哋着得少布，其實係每件衣服所表現的強烈質感！打鬥畫面雖然又快又急促，不過主角身上所穿的是皮、是布，還是織錦，仍然叫人清楚可辨，加埋強烈的光源變化，女角的身材更顯現得玲瓏浮凸，以一隻格鬥Game嚟講，暫時真係未有Game可以同佢匹敵。
屬性招數有策略
《DOA4》可以俾玩家經XBOXLIVE!連接其他玩家進行對戰，雖然每次只可同另外一個人對打，但係比起同電腦對打，真實感一定高好多。《DOA4》除咗新增3個人物（共20個），主角嘅招數都加入咗唔同屬性，玩家可以更加了解唔同主角嘅優點缺點，從而更有策略咁戰鬥。今集重新增咗一個「CameraMode」，玩家可以用「相機」影低自己打低人嘅英姿，非常過癮！
Profile
類型：格鬥
推出日期：12月29日
售價：8,190日圓（約港幣$530）
日本現賣新Game速報
《EveryParty》小丸子玩BoardGame
遊戲由《小丸子》原創者櫻桃子製作，是一個BoardGame，玩法好似玩棋咁鬥快去終點，中途會有小遊戲穿插，支援1至4人。
售價：6,090日圓（約港幣$390）
《PERFECTDARKZERO》32人網上對戰
《PERFECTDARK》系列嘅射擊Game相信唔少人都玩過，嚟到XBOX360，立體感做得好出色，另外特別在可以透過LIVE!上網，最多支援32人同時對戰，咁大陣仗玩起上嚟都刺激得多啦！
售價：7,140日圓（約港幣$460）
《RIDGERACER6》日本至熱賣
喺日本一開賣已經非常受歡迎，今集有超過130架賽車及30條賽道提供，加上闊螢幕揸車真係夠晒好Feel，而且支援XBOXLIVE!最多10人對戰，可以測試吓自己實力去到邊，正！
售價：7,140日圓（約港幣$460）
《FIFA06》勁逼真世界波
XBOX360畫面咁流暢，大家都唔需要質疑呢隻《FIFA06》嘅流暢度，收錄咗72個國家共1,700個選手，以世界各地球場為比賽場地，逼真度相當高，玩家也可以連同另一玩家網上對戰。
售價：7,140日圓（約港幣$460）
