香港管理專業協會（HKMA）45周年會慶，噚日喺洲際酒店搞咗個晚宴，協會主席李國寶同太太潘金翠早早到場，而協會一眾委員，好似范鴻齡、鄭善強、霍震寰、劉國元等都齊齊迎賓，主禮嘉賓曾特首帶埋老婆到賀，致辭之外重留低食飯，非常畀面。
除咗食飯，大會即場頒發最高榮譽嘅會士銜、特級會員銜，同埋管理發展學分獎，得獎者連埋賓客，足足有成51圍，場面不知幾熱鬧，據華華所知一般賓客每位$830，學生會員就每位$730。
據悉會士銜只頒畀管理界有卓越成就人士，名額唔定，今年就有7人獲得，分別係中電包立賢、香港上海大酒店郭敬文、中原施永青、律師黃英豪、滙豐邵銘高、永隆伍步剛，同埋蘭桂坊之父盛智文。
至於獲頒特級會員銜就有余仁生、俊和集團、益德內衣、第一太平戴維斯、大快活、英國保誠、莎莎國際、TCL、聯業製衣、震雄集團及蘭桂坊控股；而管理發展學分獎就由交通銀行同冠威管理獲得。
眾多得獎者當中，以中原施永青班Fan最夠聲勢，事關佢公司一眾高層，好似黃偉雄、陳永傑、張奕威，以及一姐劉瑛琳等，都齊齊出席捧老闆場，如果有最齊心獎，中原都一定贏埋。
李華華