踏入12月，係大小企業開party嘅高峯期，幾乎每日都有兩三場，華華蒲到不亦樂乎。評級機構惠譽國際（FitchRatings），上周就喺國金二期IsolaBar搞咗個酒會，請埋百幾個客戶一齊玩。惠譽家吓喺全球49個地區都有辦事處，品評嘅機構名單內，有超過1600間銀行、1400間保險公司，及逾1200間企業，幾乎講得出名嘅都有齊！
佢哋嘅執行董事馬大偉（DavidMarshall）同華華講，香港家吓有27名員工，未來重會繼續請人，現有員工來年唔止有人工加，更會有花紅分咁話，大約係人工嘅兩成左右，呢個消息當時尚未正式出Memo話畀員工知！
佢又話，中國係好有發展潛力同增長好高嘅市場，但要係國內搞好業務都好困難，事關上面好鬼複雜，要慢慢了解清楚先得，唔可以太急進。