有時做AO就好似做明星，曝光率高對仕途唔多唔少會有幫助，但有負面新聞嘅時候又會令事業停滯不前，甚至倒退㖭！反應靈活嘅，就識得「忍一時風平浪靜、退一步海闊天空！」
最佳例子要數人稱「米老鼠」嘅盧維思，維港巨星匯之後佢一改高調作風，又捱得過，仍在做佢嘅署長。
政壇夏蕙姨激親高官
唔識忍嘅有邊類？當中表表者要數鍾麗幗，若能沉得住氣，唔同前市政局主席梁定邦互插，當年做署長就唔會燉冬菇。退休後嘅佢重係愛出風頭，西九事件搞到政府要收緊高官退休後到私人機構工作嘅規定，令到啲就退休嘅AO媽媽聲，當正佢係政壇黃夏蕙。
年輕一輩嘅AO亦有好例子。老董推行問責制之初，一下子加多好多個AA（政務助理）。年輕一輩AO視呢啲係升級位。當年頭一批AA當中，就有一個I小姐，負責招呼大蛇局長。佢嘅工作能力頗高，但係有個經常見報嘅區議員丈夫，一時喺酒吧消遣遇襲，一時俾人投訴，最頂癮係以前佢又試過將老婆做官都攞嚟講。冇耐I小姐就從AA位退下來嘞！
做局長AA機會難得
不過，忍耐就是為官之道，最近老友就八畀我知I小姐又有得做AA嘞，今次服侍邊個局長？咪就係唔肯俾人𦧲嗰個囉。
呢個機會真唔易得到，不過，佢老公最近好似喺度想告另外兩個同區區議員。唉！我只好祝佢好運嘞！