世貿會議明日正式開始，示威行動則喺昨日開鑼。除非亂過亂世佳人，否則影響都只係心理上嘅。開會期間，或者叫做示威期間，個市如果急跌，則低價撈C輪。
恒指C輪9155：大市睇好，直接買恒指C輪，隨便有10隻8隻大成交畀人揀。鍾意炒低溢價嘅可以，鍾意揀高溢價嘅亦得，鍾意睇引伸波幅炒嘅亦冇問題，各適其適。
9155數據靚，諗得過。隻輪明年1月下旬夠鐘，輪價18.9仙，溢價1.6%，槓桿率23.2倍（有效16.4倍），引伸波幅17.1倍。恒指每變動100點，隻輪升跌11%。
和黃C輪4872：和黃（013）連續回咗兩個禮拜，上周五收72.65元，估計72元邊邊守得住，低位買C輪。
和黃C輪大把你揀，不過太近期嘅，如果溢價唔低，理得佢槓桿率爆到飛起，最好咪沾手。正股牛皮，高溢價輪嘅輪價，可以喺兩三個禮拜後大跌1半以上。實實際際，揀4872，明年6月尾夠鐘，輪價78仙，溢價4.7%，槓桿率9.3倍（有效6.2倍），引伸波幅25.9%。
4887上周收1仙，散44%，下周二最後買賣，行使價77.80元，正股低5.15元，輪下又添亡魂。
章盛