一位讀者心水清，到咗年尾就寫信嚟問岑寶桂（桂姐）如何預測丙戌（狗年），並想知道桂姐嘅電話、地址，親自去問卜請教。
啱嘞，桂姐嘅《狗年問阿桂》啱啱出版，報攤有售，你睇吓就知道桂姐人在何處，點樣搵到佢。
未睇狗年之前，先搵番本《雞年問阿桂》，睇睇去年之占卜預言是否一矢中的。占董建華（第二十九頁）話：「奉勸董先生在乙酉年發功前，最好提防身邊親信。卦象顯示，他將被親信所累，事情變化得令他難以招架，弄到十分頭痕。」董生已經下台，是否被親信所累，我哋唔知，桂姐可能中咗一半。
桂姐占雞年地產，話市場冇方向，冇主導，大市缺乏承接力，又算中咗一半。占黃金呢？錯咯，黃金猛升，冇回順；講加息，啱晒，第三十九頁講優惠利率：「吼你唔覺意，加啲又加啲！」不過最準都係講恒生指數走勢（第三十五頁）：「春季起波浪，入夏見漩渦，初秋新景象，中秋宜留神，迎冬不莽撞。」睇番恒指走勢，○五年夏季急升，八月份一萬五千五百點見頂，回落，再上，九月十八日中秋之後，直奔一萬五千五百點，但係一個不留神，十月初開始，恒指跌咗一千點過外，最近升番，牛皮，真係中秋宜留神，迎冬不可莽撞也。
狗年又如何，桂姐講地產：「表面風光，不要開心得過早」。股市、恒指走勢偏軟，乏力向上。滙豐股價，未如理想，今非昔比；黃金，波動反覆，上落飄忽，大勢偏軟。其餘不一一覆述。
預測之言，不可盡信，捉到少少玄機，就可以趨吉避凶，逃過大劫。唔信嘅話，冇所謂之至，求心安便是，世事多險惡，不貪不謀，注重精神修養，經常保健，生活自然快樂，成日掛住炒股炒滙炒金炒樓，求神拜佛占卜希望年賺千萬嘅話，心理負擔好重，因住不勝負荷。