陳霽平小時候很討厭高竇貓，但在朋友感染下，現在不但不恨貓，還變成貓癡，在家中飼養了一黑一白的金吉貓。陳霽平笑謂兩隻貓咪常在家爭吵打架，亂作一團，十分頑皮。
陳霽平家中飼養了兩隻雌性的金吉貓（Chinchilla），一黑一白的，猶如黑白雙煞般在家中你追我逐，可愛至極。記者邀陳霽平帶寵物拍照當天，她卻只帶了白色的叮噹來，她表示並非偏心，而是這對黑白雙煞在家中不時爭吵打架，陳霽平擔心帶這兩隻從未見過世面的頑皮鬼上街，會在街上亂竄一通，故最後揀了較乖巧的叮噹擔任模特兒。
養貓方便
陳霽平說：「我讀書時好鍾意狗，好憎貓，因為佢哋個樣實在太高竇，但身邊有唔少朋友養貓，有時去朋友屋企同啲貓貓接觸多咗，發覺佢哋都有可愛一面，尤其係Chinchilla，佢哋個樣肥嘟嘟，好儍好可愛，加上養貓比養狗方便好多，起碼唔使日日帶佢哋落街，又唔一定要日日陪佢玩。你知啦，做娛樂圈呢行，好多時日夜顛倒，一返到屋企就想撻落床休息，如果屋企養狗嘅話，佢一定會千方百計撩你玩，唔理佢嘅話又唔忍心，但貓就唔同，就算你唔得閒理佢，佢一樣自得其樂。」
歎鵝肝醬
陳霽平表示起初叮噹對她不瞅不睬，在悉心照顧下，叮噹變得愛向她撒嬌，陳霽平說：「佢一向好寸，我好辛苦至令到佢睬我，好有成功感。但叮噹左耳曾經發炎，要做手術，做完手術後左耳唔能夠豎起，耳仔一高一低，真係好可憐。」原來除了貓糧外，叮噹最喜歡吃鵝肝醬，每次聞到陳霽平吃鵝肝醬時，便會喵喵大叫，要求分甘同味，認真識歎！
採訪：戴彩煥 攝影：葉君海
髮型：ZapTangbyChin.G 場地：奧海城
