昨日沙田馬場跑國際賽，反世貿大軍則在灣仔及銅鑼灣熱身，趙飛雲雖然身在馬場亦覺得氣氛有啲怪，特別係第7場跑香港一哩錦標前，參賽馬原本在亮相圈行得好哋哋，突然全部馬解鞍唔跑咁嘅款，隔鄰老友更話唔知係咪有炸彈定係反世貿大軍殺到沙田，賽事要腰斬。好彩兩樣都唔係，只係有塊鉛由馬鞍跌咗出嚟，啲馬要重新過磅。
雖然只係虛驚一場，不過加上早前有騎師墮馬受傷事件，趙飛雲興致大減，睇完「爪皇凌雨」贏取香港盃兼成為世界馬王後，亦提早離場。
反世貿示威勿輕視
港府如臨大敵做好準備應付反世貿大軍的示威行動，照計唔應該會出大亂子，不過人心難免受影響。股市最怕不明朗因素，人心虛怯令淡友有機可乘。今個禮拜變數多，買賣要加倍謹慎。
美股上周五先低後高，杜指升23點收市，報10778。油價回落支持美股回升。聯儲局明晚議息，市場普遍預期會加息1/4厘，但就希望聯儲局發表息口好快見頂呢類言論，可以支持股市再升。因此今明兩日趙飛雲都會睇多過做，等埋聯儲局議息結果及對息口的看法。
上周五買入中海油（883）博油價短期破位，但當晚在油價回落到59.39美元收市，如果今日喺亞洲市冇反彈，倉內的中海油可能會有些少沽壓，但估計就唔會太大，中海油ADR上周五在美國收5.53元，較香港收市5.55元，跌幅輕微，暫仍以5.35元作止蝕位，跌唔穿會繼續揸住。
天氣預告美國東北部兩周後會有嚴寒冷鋒殺到，可能會刺激油價再升。
趙飛雲