容祖兒前晚帶病出席黃偉文（Wyman）十周年演唱會，她因喉嚨不適沒法獻唱，由趙學而頂上，祖兒表示感覺如被搶去男友。Wyman對於陳小春在上海拍戲而缺席，感到很生氣。
容祖兒、陳奕迅（Eason）、何韻詩、Shine及趙學而等前晚在會展演出「AManandAPen黃偉文十周年」音樂會，眾人獻唱黃偉文填詞的作品。何韻詩打頭陣，盧巧音唱《垃圾》時卻表現失準，甩嘴又走音，麥浚龍（Juno）上台則被噓，林海峰以神秘嘉賓身份出場，唱愛妻彭羚的《小玩意》，他還即席拉票叫觀眾在商台頒獎禮投他一票，壓軸演出的Eason則最受歡迎。
自己唔爭氣
音樂會中段時，Wyman捧着鮮花上台說：「星期四有個歌手打畀我，話喉嚨痛擔心唱唔到，怕唱得唔好令觀眾失望，佢休息後第二日準時綵排，都係唱唔到，再休息諗住開騷有奇迹，佢化妝整頭後，奇迹冇發生到，個歌手叫我唔好怪佢，佢盡咗力我唔會怪佢，希望大家都唔好怪佢，佢就係容祖兒。」
祖兒即上台收花，但未有說話，後來Wyman哭着說：「一位歌手一路傍實我知道成件事，見我好擔心，話我個騷唔可以唔唱《痛愛》，我唔擅於社交，但遇到好多好人，總會有天使救我一命。」然後由趙學而代祖兒唱《痛愛》。祖兒以微弱聲線說：「學而唱我首歌我唔介意，不過好似男友俾人搶咗咁。佢唱得好好，我嬲自己唔爭氣，稍後我會去南京針灸。」
怨小春失場
Wyman對於陳小春臨時甩底大動肝火，事關小春在上海拍戲，前一晚才通知電台未能返港演出，Wyman表示已收到小春的手機短訊，他說：「我有唔開心，我想查清楚件事，究竟應該嬲邊個，藝人永遠唔清楚自己個期，責任喺身邊嘅人度，由頭到尾我冇嬲小春。」
何韻詩接受訪問時表示Wyman所作的《未來》，讓她示愛成功，但她不肯透露愛人是誰。
採訪：王連連 攝影：林德雄
