呢個12月香港真係名副其實的「動感之都」，股市方面有對沖基金「小朋友」反轉領匯（823）同埋新世界發展（017）。世貿會議今個星期在香港舉行，反世貿大軍一早殺到，唔知今個星期會否反轉灣仔及鑼鑼灣？
話就話世貿唔應該同股市有直接關係，但如果真係引起暴動，就好難話會冇影響。
講起「小朋友」基金，最新動作就係參與百仕達（1168）嘅配股，由於「小朋友」呢排風頭甚勁，再加上百仕達配股有金手指及其他兩個基金參與，陣容咁鼎盛，睇嚟百仕達今日復牌，股價肯定有大波動。
百仕達今次按先舊後新方式，向4個基金配售2.8億股，每股作價1.95元，集資額5.32億元。百仕達停牌前按盤價2.075元，雖然算係近年高位，但貨源主要配畀4個基金，唔係通街派，應該唔驚會有大沽壓。
經紀黃話，呢期大陸地產股當炒，投資者憧憬人民幣明年會再升值，唔排除百仕達股價高處未算高。
慕容小初