花旗銀行高層出征澳門旅遊塔,玩高飛跳(SkyJump)籌款的壯舉,終於喺前日順利完成。當日風和日麗,3名健兒從233米高空一躍而下,為「SantaClausOperation」籌到46萬元善款。花旗嘅企業傳訊部同埋企業及投資銀行部等部門,派出30多名同事組成啦啦隊,專登過大海去濠江,為「義跳」的3位外籍高層吶喊助威。
有份跳塔籌款的花旗香港區企業及投資銀行部阿頭范浩宏(FrankSlevin),雖然從未試過笨豬跳或高飛跳,但勇者無懼,跳前跳後都輕鬆自若,重食埋嘢先上旅遊塔作「處女跳」,完全唔怕嘔,佢個寶貝仔見到阿爸咁威猛,都心郁郁想跳埋一份,果真虎父無犬子。不過,原來有關方面規定要最小11歲先可以玩高飛跳,呢位小朋友要等多3年至得嘞。
李華華