世貿會議開幕，呢一個會，單係記者團人數都以千人計，當然係國際盛事，但最令人矚目的，就係一直以來都有一班「跟到貼」、為數有數千人的示威團體。據同保安界有聯絡嘅人士告知，呢一班人嘅動員能力非常強，唔排除會議期間會頻生事端，嚴重嘅可能會令到交通癱瘓，甚至金融動盪，股市當然亦會受影響，而出現大幅波動，呢一個係「高危」星期，大家要小心。
英國基金TCI繼大手吸納領匯（823）同新世界發展（017）後，又向近期大熱的內地房地產股埋手，購入百仕達（1168）3%，動用資金逾1.5億元。百仕達今次以先舊後新方式配售2.8億股新股，除TCI外，接貨的機構投資者重有GLGPartners、PMA資產管理同惠理基金。
百仕達持有威華達（622）74.8%，後者合併百江燃氣（1083）後，已成為集電力、燃氣及煤氣化於一身的大型能源公司，相信威華達日後亦有好大機會成為基金股，值得留意。
康健與蔡志明成大股東
玩具大王蔡志明成為康健國際（8138）第2大股東後，康健發展步伐立即加快，宣布同星虹控股（397）合作，在港設立化驗及身體檢查中心，提供先進醫療服務，而星虹亦計劃易名為康健醫療科技有限公司
康健以6000萬元認購星虹可換股票據（換股價4.1仙），而星虹亦以3.8仙配售1億股予蔡志明女兒蔡加怡，以及配售1.76億股予獨立投資者。康健行使換股權後，連同蔡加怡所持權益，合共持有星虹59.6%，成為最大股東。
星虹轉型，值得憧憬。停牌前，星虹市值僅4000多萬元，引入康健同蔡志明成為大股東後，大舉發展新業務，市值相應會翻幾番，股價亦好有機會脫離「仙班」。
體檢醫療中心愈來愈普及化，而大眾化收費的健康檢查將會更受歡迎。星虹的香港體檢中心佔地2萬方呎，預計06年中開幕，日後並會進軍澳門和內地。星虹轉型，現時只係第一步，大股東財力雄厚，生意瓣數又多，有理由相信日後會繼續注資，星虹亦會不斷壯大。
郭兆誠