政府原定喺京士柏山配水庫公園興建狗公園，點知喺施工期間突然停工，隨即引起咗該區養狗居民不滿。部份愛狗嘅藝人古天樂、傅明憲、利嘉兒同施念慈等均群起反對，噚日過百名狗主就帶埋隻狗去到原定興建狗公園嘅地點舉行集會，表達對政府嘅不滿。
有必要興建
古天樂媽咪噚日拖住心愛嘅雪橇犬出席抗議集會，佢話今次活動並非抗議遊行示威，只係集合眾狗主，以和平嘅方式向政府表達意見。
古仔媽咪話：「希望政府包容我哋，我哋只係自發性上嚟，表達愛護、支持自己隻狗，人需要空間活動，狗亦都需要，我哋只係希望政府畀狗仔有番啲空間。」古媽媽話平時都會有三十幾隻狗同時喺呢個公園嘅空地散步，顯示狗公園是有需要興建，政府停工只係因為有少數人反對，就剝削咗狗主同狗仔嘅自由。
