李克勤老友梁榮忠早前與朱慧敏在車廂激吻斷正，令忠仔女友鍾麗淇氣得頭頂冒煙，對此克勤雖拒表意見，卻自嘲難遇小魚兒，未逢機會做偷腥貓之餘，更乘勢向女友盧淑儀大派定心丸，鐵定兩年內迎娶女友。
情義篇：擺酒留回憶
李克勤老友梁榮忠與港姐朱慧敏車廂親熱事件轟動一時，目前忠仔除工作外，每天都自閉家中，女友鍾麗淇氣難下又捨不得。克勤不介意講老友的桃花劫，但一句到尾，請忠仔自行收拾爛攤子。
日前克勤在尖沙嘴接受訪問，話匣子一開，先替老友講好話：「個個人都有錯嘅，作為朋友希望可以為佢分憂，盡快度過呢件事，希望觀眾可以平息憤怒，畀個機會佢。現階段我講太多對佢唔公平，睇佢自己點面對。」
拒為忠仔求情
有傳克勤曾就忠仔偷食一事向無綫高層陳志雲求情，他斷然說：「我冇！忠仔係成年人，做呢行時間好長，點做佢應該會知，作為朋友係分析件事、畀啲意見，最後點面對、用乜嘢方法嘅權利就留番畀佢，大家太高估我喺TVB嘅影響力，我只係一個員工，唔會影響高層嘅決定，TVB繼唔繼續用佢，同李克勤完全冇關，個爛攤子係佢自己搞出嚟，責任係由佢收拾，冇人幫到佢。」
常言「沒有不偷腥的貓」，克勤是否一頭不偷腥的貓兒？他哈哈笑說：「唔知偷唔偷㗎，未遇到呢啲魚喎，成日都希望遇到，但成日都冇呢啲魚游埋嚟，開頭都有，但唔好畀自己有呢啲機會，講自己偷唔偷食對佢（忠仔）唔好，自己好彩啦，游過都冇網撈，其實我係一個悶人嚟㗎！」
克勤續說：「普通人見我喺螢幕前好開心，嘻嘻哈哈，覺得我係螢幕上嘅周星馳，但我唔係囉，工作上我係一個好嚴肅嘅人，我嘅工作範圍已經多姿多采，離開工作就想簡單啲，我比較鍾意簡單生活，唔會刻意搵節目，都係打golf、睇波、食飯、煲碟、打牌囉，來來去去數得出都係嗰幾隻腳，Emily（女友盧淑儀）都係一個咁嘅人。」
「冇諗住退貨」
克勤自言四十歲前一定結婚，他說：「我會結婚，唔會跳step，但話唔到畀你聽準確時間，唔會講出明年定後年，總之四十歲前一定會。」至於會否大排筵席，他直言有想過又否決過，但最近想通了，還是擺酒吧！克勤說：「我講過唔諗住擺酒，但有次林海峰幫我做唱片封套，佢話佢唔like擺酒，好煩、好多嘢搞，但會係好好嘅回憶，一個咁潮嘅人，以過來人身份話係值得，令我重新考慮，一個cocktail又好、party又好，係值得去做嘅一件事。」
克勤言談間已向女友派了保一世的定心丸，他笑說：「人其實每日都喺度變緊，係互相支持，尋求開心生活，兩個人唔開心都唔會一齊，有日佢唔開心、或者我好唔開心就會分開，冇乜點樣去整到歷久常新。大家一齊開心就keep住，好多嘢大家係互相影響，可能大家已經覺得好滿意，收貨，冇諗住退貨，雙方唔需要刻意改變。」
撰文：朱倬誼
攝影：葉君海
髮型：AdolphBow
化妝：AngelYip
服裝：JoyceBoutique
場地：香港洲際酒店
