在一年多前，李克勤的健康跌至低點，被譽為演唱零瑕疵的他，精神差、氣管差、聲帶差，唱歌走音，令他大受困擾。
克勤說：「舊年七月開始，身體狀況同精神都好差，唔係十八廿二咯，做好多運動、生活咁正常都可以咁，聲帶出問題，唔係話好大問題嘅，觀眾都冇發現。我個人易攰，達唔到自己演唱水準，舊年做《香港小姐》表演嘉賓，有part同GiGi（梁詠琪）唱歌，聽番都好得人驚，好似唔識唱歌咁，喺差唔多時間，我做太陽計劃，走埋音㖭！」
祖兒救命
克勤續說：「有次同祖兒去南京做嘢，佢介紹咗個針灸師畀我，幾好喎，我俾佢針過之後效果理想，呢次佢嚟香港睇演唱會，唔係行醫，但都有幫我針，𠵱家好好啦。
「嗰時我睇西醫，又塞支鏡睇喉，佢話我聲帶腫，休息就冇事，但點有得休息呀？望都唔好咁望啦，醫生話病嘅時候，重要繼續唱歌，聲帶會疲勞過度，𠵱家我都好番九十五個巴仙，盡量唔好畀自己唔夠瞓，半夜唔睇波，錄低第日睇。三十八歲啦，唔好當自己十八、廿二咁辛苦啦！」