相信好多人都試過喺網上結識朋友，好彩嘅會成為密友，唔好彩嘅話隨時俾人利用！喺資訊發達嘅年代，如此現象本來好普遍，但《電車男》呢個故事，就偏偏發生喺一名終日沉醉上網嘅年輕人身上。最奇怪係，呢班網友唔止係好朋友咁簡單，佢哋重係「電車男」嘅追女智囊團，繼而引發生一輪真實而又搞笑嘅戀愛體驗！特別一提，《電車男》題材源自全日本最大匿名網上ChatRoom「2ch」，因事件充滿話題性，後來更被人改編推出小說、漫畫、日劇、舞台劇甚至朗讀劇，受注視程度可想而知！
記者：陳國輝
電影取材自日本80年代尾御宅族，該「族人」只專注上網打機、睇漫畫；性格內向，不懂社交，連追女仔都無膽！故事就發生喺網名為「電車男」嘅22歲網絡工程師（山田孝之飾）身上，有一晚佢喺ChatRoom留低咗一段英雄救美嘅事迹，引發網民廣泛討論；後來網友毒男三人組、甩拖女護士以及自閉男等組成智囊團，部署一條追女秘方，電車男於是鼓起勇氣，向「愛瑪仕」（中谷美紀飾）展開追求。
唯一蒲點秋葉原
《電車男》世界裏面，包括電車男及網友毒男三人組在內，都被視作為女性絕緣體──亦即「毒男」！性格內向，害怕與外界接觸；唯一興趣就係逛日本著名嘅電器街──秋葉原。經常獨個兒買電腦、漫畫書、扭蛋玩具，久而久之，就習慣咗非群體生活。要佢哋交際應酬，一定驚到面青青，更何況係追女仔呢？電車男之所以成為ChatRoomNO.1紅人，除咗故事夠耐人尋味，佢哋膽量、勇氣，更成為其他電車男仿效嘅對象。
值得慶幸嘅係，當網上充斥着騙財騙色嘅壞人，電車男竟遇上一班真正嘅知己。佢哋唔單止教路追求愛瑪仕，正當電車男打算放棄之際，佢哋重給予支持與鼓勵。當然，互聯網上好人壞人都有，最緊要小心挑選朋友，萬一經常學電車男咁有嗰句講嗰句，私隱揚晒開去，咁就相當危險！
漫畫小說銷量過100萬
日本好興將小說或者漫畫改編拍成電影，《電車男》本來只係網上ChatRoom嘅真人真事，但其原著小說銷售已突破55萬本，而漫畫亦狂銷50萬本，合共達100萬本之多！所以，喺推出普通裝DVD版嘅同時，本港亦推出咗2,000套限量特別版，以滿足一群本地《電車男》Fans需要！當中包括彩頁圖集、限量版證書以及茶杯。留意BonusCD內，有製作ChatRoom友經常玩嘅ASCIIART，重提供相關網站畀你參考，學識後Send個Website畀Chat友一齊玩，肯定啱晒啦！
Profile
片種：愛情
區碼：3區
銀幕：16：9
音響：dtsES/杜比數碼
語言：粵、日
售價：$99/$199（特別版）
泛亞（23528222）
