倪匡表示最愛閱讀《蘋果日報》，每日起身睇完才去刷牙，記者指倪匡頭髮豎起，是否出門前沒有梳頭？他說：「我冇洗頭，𠵱家頭唔痕就唔洗頭，身唔痕就唔沖涼，除衫唔解鈕，一切從簡。老婆成日話我，最污糟就係你。」
倪匡說：「今次返嚟好開心，我以為我已經out晒，估唔到重咁多人記得我。」問倪匡是否真的打算回港居住，他說：「睇吓三藩市間屋幾時賣得出就返嚟，我間屋好古怪㗎，好難賣得出，三層樓總共得一間房，我喺二樓睇電視，可以同喺地下廚房做嘢嘅老婆傾偈。」
曾說過「我生命中的寫作配額用完了」，問倪匡是否真的打算封筆，他笑說自己：「𠵱家人又老，錢又冇，寫嘢又寫唔出，差啲就夠資格攞綜援。」記者指《衞斯理》系列一寫四十二年、一百五十多本書的版稅應夠他食一世，倪匡即笑稱自己現時食軟飯，並說：「𠵱家都冇人買我啲書，一係上網睇，一係就去圖書館借，內地就淨係可以賣老翻，唔可以賣正版，一季嘅版稅都冇一百蚊美金（約七百八十港元）。」記者指他是否記錯一日有一百蚊美金，倪匡即笑說：「你畀我呀！」