有冇聽過《國王的新衣》個故事？八方噚日又一次見到小朋友講嘢直腸直肚嘅本色。特首曾蔭權噚日出席「青年高峰會議」同一班年輕人真情對話，之後當佢踏出會場，遇到十幾個示威嘅貧窮兒童，呢班跟社區組織協會嚟嘅小朋友，都係靠執紙皮幫補家計，所以畀咗煲呔一封用紙皮包住嘅請願信同貧窮兒童調查報告，煲呔唔單只接信，重停低咗成五分鐘，同班小朋友傾偈，好似好親民咁。
華女猛話唔滿意
八方之後走埋去問同煲呔傾偈嘅華女，點知佢猛話「唔滿意」，原來十一歲嘅華女想同特首講貧窮兒童問題，但煲呔淨係「問我幾歲、住喺邊，又問我哋有冇份做呢份報告，邊部份係我哋做嘅。我哋都冇咩機會講意見。」華女同身邊十二歲嘅嘉妍話，特首唔係有心留難佢哋：「只係想扯開話題啫。」
呢兩位大膽向特首直言嘅細路女其實人生經驗唔少㗎，幫屋企執咗成年垃圾，好似紙皮、鋁罐咁，前幾日凍到得攝氏十零度，佢哋都一樣要做：「屋企人賺錢唔多，我哋要幫手。」煲呔成日話要體察民情，而華女想同佢講嘅就係當事人現身說法嘅民情，煲呔就咁放棄大好機會，可惜可惜。英雄莫問出處，希望華女同嘉妍佢哋努力讀書，第日出人頭地。
爆料熱線：29290000、27860099
報料傳真：26239278
報料電郵：[email protected]