每年一度的樂壇頒獎禮，又是歌手領成績表的時候，去年是克勤與古巨基之爭，今年更催白熱化，陳奕迅回歸擠進戰圈，有關攞獎問題，克勤說他懶得去想，因為曾贏過又輸過，還有一個樂壇超能鬥士劉德華長在，想攞獎倒不如想辦法賣碟，感覺比較實在，故最近只埋頭搞好剛推出的新碟，以及籌備明年初舉行的演唱會。
難敵劉德華
克勤笑說：「對我嚟講乜都試過，最好、最唔好嘅獎都試過。好多嘢唔喺自己控制範圍之內。歌好，你頒個獎畀我，笑住攞啦，其他好過我嘅人攞獎，都實至名歸，諗吓華仔都好開心㗎，唔係單單一個威，但多幾個華仔就唔知點算啦！見到佢真係無話可說，佢係一個超人，冇法阻止佢，我識佢好耐，以前佢會緊啲，𠵱家easy咗，四大天王時樣樣都擺出戰鬥格，𠵱家都係戰鬥緊，但你可以埋嚟。華仔好勤力，喺呢個圈唔勤力會好快拜拜，呢行未必有人付出少過華仔，有華仔咁嘅級數但咁勤力就冇第二個。」
不過，被稱為無綫契仔的克勤，今年花了很多時間主持《殘酷一叮》，明年又會以一個月時間任四年一度世界盃主持，即傳來換獎之說。
《一叮》換獎？
克勤說：「做《殘酷一叮》換獎？呢啲可以換就簡單得多啦，使鬼咁勤力做咁多嘢咩？淨係幫TVB咪得囉！我唔鍾意用幫呢個字，係互利情況。我八八、八九年已經第一次拍劇，拍劇可以換獎，咁我應該喺十幾年前攞，羅嘉良做歌手時，有冇見佢攞最受歡迎男歌手獎？」
克勤認為今年樂壇頒獎禮走勢如何？他說：「問我都係劉德華，兩個年代有兩個永遠受歡迎嘅男歌手，一個係譚詠麟，一個係劉德華，最受歡迎就梗係芸芸男歌手中最受歡迎嗰個啦！」