黃金價不斷上升，交稿時，黃金價突破每安士五百一十美元，創二十四年新高，於是唔少市場人士話黃金價睇六百美元；幾個禮拜前，市場黃金專家重講緊黃金價嘅大阻力位係五百美元，點知在五百美元大關前，金價稍作徘徊，一舉而破之，於是冇人再敢話金價會回軟。
人人唱好，百分百睇升之時，就要特別小心，只得曹仁超一個人睇好黃金之時，先至係入市良機。𠵱家一面倒睇好，跟又難，唔跟又怕走雞，好煩好煩呀。小記者G採訪黃金專家唔少次，幾間經紀行都有小記者G嘅手機號碼，呢日小G收到電話，對方一開口就話：「我係乜乜公司嘅XYZ，想介紹你投資黃金，賺梗㗎，唔好走雞！」小G經常記得一句話：「股價有升有跌，投資者要衡量個人風險」，收到呢類電話，邊會咁天真，信到十足吖。小G猛咁推，位經紀搏命推銷：「呢個時候買金，真係賺硬嘅噃，你冇理由唔開戶口㗎，咪見財化水啦，開個戶口炒一轉啦，實賺嘅呢！」
小G無言以對，唯有收線。世界上冇實賺嘅投資投機，小G做人踏實，好驚輸埋份糧，佢話：「估唔到啲經紀咁搏命，睇嚟係股市上落冇方向，外滙唔郁，只有黃金有明顯上升趨勢，所以猛叫人炒金，等佢賺佣！」此乃理所當然，經紀從來都為自己佣金打算先，客戶輸死一個，又會有第二個嘅啫，何況三唔識七嘅coldcall經紀！
金價確實有上升動力，但近來升勢太急，高追就冇謂，等金價獲利回吐，調整到五百美元左右先至買，就比較穩陣一啲，除非你日日睇住個市，夠膽短炒啦。買期金，倫敦金，孖展唔算高，故此風險好大，買實金冇息收，要考耐性。甚麼無名經紀打電話嚟hardsell黃金，最好咪制。