泛海（129）同類陳年大折讓股，呢期瘋狂，泛海重喺近1年低位載浮載沉，有得諗。新世界及麗新系呢期升到飛起，呢兩系嘢，散戶平時唔多願望兩眼，但資產重秤兼折讓大嘅特點，就俾基金挖到。泛海亦唔例外，計埋阿仔泛店（292）前排配股攤薄效應，泛海NAV講緊0.82元，現價折讓63%，大到離譜。又前排大道中連卡佛大廈標售，有報道話標價去到每方呎1.1萬銀（業主最後惜售），而泛海揸住嘅泛海大廈（13.3萬方呎），就喺連卡佛斜對面。計計數，單係呢幢物業市值，幾乎係泛海集團本身市值，泛海收租物業一樣重秤。
再講，里昂啱啱為麗展（488）發報告，重估麗展NAV去到0.433元，呢期麗展一支箭後，就算參考里昂基準，麗展NAV折讓55%；而今年頭，里昂亦為泛海發報告（話佢NAV值0.98元），就算唔採納里昂基準，泛海家陣折讓講緊63%，追番麗展折讓水位，泛海要升23%。里昂嘅新歡舊愛，點揀？
百利保有sellingpoint
百利保（617）呢期屬世城系內比較生猛嘅一隻股仔，短線有機，又講兩點：第一，百利保計埋嚟自富豪酒店重估增值，最新實際NAV係0.56元，現價（0.182元）折讓近68%，屬系內資產折讓最大嘅股份，呢期市場狂炒折讓股，百利保有sellingpoint。第二，02年發行一批為數34.5億股可換股優先股，已經喺04年度期間全數轉為普通股，亦即係話，除非百利保有伸手動作，否則可免卻同系重有可換股優先股及可換股債券換股後，潛在沽壓隱憂。百利保破到0.185元阻力，應該見0.2元，啱短打。
錢雋