（1）勿越級挑戰
「玩呢個遊戲一定要循序漸進，切忌越級挑戰，唔好以為可以一步登天，一定由最初級嘅遊戲開始玩，等自己明白及了解咗成個遊戲嘅規則，先好挑戰另一個級別，我知道有個立體型嘅數獨，但連我都覺得太難，所以要量力而為。」
（2）鉛筆玩較佳
「玩呢個遊戲最好就係用鉛筆玩，雖然我有時為免整污糟隻手都係用原子筆玩，但係如果用鉛筆就可以一錯咗就擦咗佢，一來可以玩得快啲，二來又環保啲，唔使用咁多塗改液。」
（3）習慣做筆記
「我有個習慣就係寫notes，有時唔係咁容易就破解到一個遊戲，所以當發現一個格內可以填上幾個數字時，我就會喺旁邊寫低有幾個可能性，呢個方法真係好有用，亦都會加快完成遊戲嘅時間。」
（4）小休再闖關
「有時玩呢個遊戲可能會遇到啲阻滯，可能玩完成個遊戲先發現填錯一個數字，但係千祈唔好咁易就話放棄，反而應該冷靜落嚟，畀自己個思維休息一下，然後先繼續挑戰，咁先會發現呢個遊戲嘅竅妙。」
（5）計時增難度
「當然大家玩每個遊戲都唔可以太沉迷，因為一沉迷就失去咗成個遊戲的意義，有時可能玩到悶咗，就可以嘗試為自己計吓時，既可以挑戰吓自己，又可以從而加強自己玩呢個遊戲嘅信心。」