薛凱琪
「呢個遊戲自己從來都未玩過，因為我計數同推理都好差，而且一見到啲數字已經覺得好驚，所以今次要靠助手提水，我先可以順利完成。可能因為自己多用右腦啦，右腦係對形象先會有反應，所以見到啲數字就會差啲，不過我相信自己都唔會有心機再玩，或者可以靠第二啲嘢去增強腦筋囉。」
Stephy
「幾個月前喺報紙上第一次接觸呢個遊戲，玩完之後即刻迷上，後來覺得唔夠喉，就索性買數獨書嚟玩，我重猛介紹畀身邊朋友一齊玩，大家重會互相交流心得。其實玩數獨係唔可以靠估估吓，因為錯咗一個數字，成個遊戲就完成唔到，所以一定要好清晰去思考，同時亦都可以訓練自己嘅耐性㖭。」
廖碧兒
「之前見人玩過，都唔知係乜嚟，但係玩完之後都覺得OK。今次係我第一次玩呢個遊戲，我估要玩多幾次先知自己會唔會上癮，初初因為未接觸過就唔係好識點玩，但係明白咗點玩之後就容易好多，而且我唔知連個格內嘅數字都唔可以重複，搞到開頭錯咗少少，好彩最後都能夠成功完成遊戲。」
2R
「我哋兩個都係第一次玩咋，相信憑我哋兩姊妹嘅力量一定可以解決，因為呢個遊戲都好高難度，所以我哋好緊張，而且又要計住時，搞到我哋亂晒龍，可能兩個人一齊玩會重亂，因為你一言，我一語，可能會拖慢咗個時間，不過我哋玩完之後就覺得好好玩，相信之後我哋都會繼續玩。」
湯盈盈
「我真係玩唔晒，因為我係第一次玩。我份人係如果覺得自己做得唔叻，就會冇信心，而且我一見啲數字就已經耍手擰頭，但自從我做咗《阿旺新傳》中嘅李笑好一角之後，學識咗畀信心自己就可以做到，所以今次我都敢試吓玩，如果自己有多啲時間休息同精神啲，我相信一定玩得完。」
