地產L問左丁山：「遊過朗豪坊未？」左丁山話：「實不相瞞，未去過。」於是咁就俾佢捉住去旺角逛商場。講起嚟，我哋兩個同在旺角長大，佢讀官立名校，我讀Band5私校，喺奶路臣街踎二手書攤檔買中學課本，留下唔少腳毛。地產L嗰陣時經常在洗衣街出入，由學校行去麥花臣球場篤魚蛋、牛雜，話咁容易，麥花臣外有好多魚蛋檔，砵蘭街亦有唔少魚蛋檔，不過此蛋不同彼蛋，喺旺角讀書、成長，可講有消毒作用，學曉乜嘢叫做streetsmart。
地產L後來飛黃騰達，返回砵蘭街之日，身份唔同晒，帶住左丁山遊商場，周圍有人招呼，唔怪得佢落力到加零一。坦白講，搵一位外國回流嘅畢業生嚟旺角，好可能格格不入，周身唔自在。以前胡社生行有一間美國銀行分行，某年一位美國人調嚟做經理，住加多利山，本來十分嘆，但呢位美國經理做咗半年就要求調走，理由係「巨大文化震盪」，佢站在分行門口，見到彌敦道咁多行人，已經覺得頭暈眼花、神經緊張。乜咁怪呢？原來佢在上一個職位係塞班島分行經理，成個塞班島人口加埋都唔夠佢站在分行門口半小時所見咁多人！
地產L就唔同，返到砵蘭街上海街，如魚得水，渾身是勁，好似衣錦還鄉咁款，為旺角添注新活力而戰。左丁山雖然出身於旺角，但有n加一年冇去過昔日麗斯戲院、百樂門戲院、龍鳳茶樓嘅地方，跟住地產L係咁行，竟然有啲窒息感︱︱乜咁多人㗎！此商場有好多小商店，其中一間賣不同顏色嘅大背囊，地產L話：「你估吓一個背囊賣幾多錢？」本來想話一百幾十嘅，佢咁樣問，即係暗示貴價貨在前，於是大膽啲講：「五百蚊！」地產L笑笑口：「可以講多三次！」左丁山唔信，揭開價目牌睇吓，唉吔，售價一千五百八十，乜咁猛料，有冇人買㗎？地產L話：「你out晒咯，買家冚扮爛係年輕人，一個月嘅銷售額唔細。」當今年青人真幸福，有咁多錢買背囊，地產L與左丁山踎奶路臣街時，口袋內頂多只有一張五蚊紙。