香港股市畀「小朋友」玩到反轉。自從「小朋友」基金公布揸重領匯（823）同埋新世界發展（017）後，兩股都好似坐咗火箭咁升，尤其係新世界，昨日最高炒過上去13.20元，收12.90元，升9.79％。領匯亦升2.18％，收14.05元。
能夠將大價股炒到好似神仙股一樣，「小朋友」果然唔可以睇小。
除咗可以跟「小朋友」搵食之外，經紀黃亦推介一隻曾經熱炒過，但又被遣忘好耐嘅比亞迪（1211），佢話隻股最壞時間相信已過，聽講有芬佬趁低收集緊，可以小注跟一跟。
經紀黃話，比亞迪盈利增長低過預期，再加上大陸汽車業表現欠佳，股價由3月的25元高位，跌到落9月最低的10元水平，近排就好番啲，升回12元水平。
雖然分析員都估佢唔會咁快復甦，但預測PE10倍又好似低得滯，所以一直有芬佬收集，最近有個基金，已經申報揸超過5％。比亞迪昨日跌0.83％，收12元。
慕容小初