日股彈番220點，港股則冇乜氣，恒指只係升得31點。藍籌股中，最省鏡嘅係新世界（017），再升9.8%，拉高恒指13點。「兒童基金」魅力沒法擋。
新世界C輪：龍虎榜上，頭13位中，新世界C輪佔咗8席，升幅由22%至100%。
新世界炒NAV折讓，炒兒童基金嘅號召力，上到乜價位，好難講，睇成交，好似重有得去，但有啲超買。𠵱家上車追C輪，要諗吓風險嗰便。一定要賭，則揀9171。隻輪明年3月夠鐘，輪價2元，溢價2.2%，槓桿率6.5倍（有效5.4倍），引伸波幅33.3%。如果自問賭徒性格唔係咁重，則睇人賭好過自己賭。
期油C輪9343：期油C輪9343彈升52%，有近6球易手，成交金額24.6萬。隻輪明年2月中夠鐘，輪價4.4仙，溢價17.2%，槓桿率53.5倍。博幾個月內油價上番十元八塊（美金），唔多實際。𠵱家以高溢價買期油C輪，等同玩死亡遊戲。幾個仙去買輪，雖然係輸晒有限，但都無謂嘥錢。
中海油P輪9080：死火榜上，中海油P輪9080霸頭位，冇成交，以賣家價1.7仙計，散54%。隻輪明年1月中（即係下個月）夠鐘，溢價12%，槓桿率326倍，望正股（883）喺到期前跌12%以上，機會好低。
隻輪今年7月中發行，發行價51仙，就快完蛋，窩輪市場，又添冤魂。
章盛